İlk hücum buna görə olacaq! – İsraildən "Hizbullah"a xəbərdarlıq

“Hizbullah”ın önəmli şəxslərindən biri olan Fuad Şükürün ölümündən sonra bütün gözlər Yaxın Şərqə yönəlib.

Hərbi qruplaşma ilə İsrail arasındakı gərginliyin fonunda, ilk hücumu kimin həyata keçirəcəyi məsələsi müzakirə olunur. ABŞ mediası Livanın İranın addımlarından asılı olmayaraq yaxın günlərdə hərəkətə keçə biləcəyini iddia edib.

Qeyd olunur ki, “Hizbullah” İranla müqayisədə Təl-Əvivə qarşı əməliyyat keçirməsi üçün məsafə baxımdan ona daha yaxındır. Bu səbəbdən qısa müddətdə ilk hücum baş tuta bilər.

Rəsmi Tehran da öz növbəsində cavab tədbirlərinə hazırlaşır. Lakin 24-48 saat ərzində İranın İsraildən qisas alacağını iddia edən ABŞ-nin regionla bağlı açıqlamaları özünü doğrultmadı.

Livanın isə İrandan fərqli olaraq İsraillə ortaq sərhədə malik olması onun heç bir tərəfə xəbərdarlıq etmədən zərbə endirməsi ilə bağlı narahatlıq doğurur.

Təl-Əviv də potensial hücumla bağlı mövqeyini ortaya qoymaqdan çəkinməyib. İsrail “Hizbullah”a xəbərdarlıq edib ki, hücum nəticəsində mülki şəxslərə zərər dəyərsə, bu hal bölgədə qırmızı xəttin keçilməsi kimi qiymətləndiriləcək.