İlon Mask proqnozu ilə bu dəfə onları sevindirdi

"Gələcəkdə süni intellektin inkişafı nəticəsində insanların işləməsi məcburi olmayacaq. Buna baxmayaraq, onlar yüksək gəlir əldə edə biləcəklər".

Bu barədə amerikalı sahibkar İlon Mask sosial hesabında paylaşım edib.

Onun sözlərinə görə, gələcəkdə "ümumi yüksək gəlir" sistemi formalaşa bilər və insanlar işləmədən də təmin olunacaqlar.

Mask bu fikri sosial şəbəkə istifadəçilərindən birinin süni intellektin ABŞ-də iş yerlərinə təsiri barədə paylaşımına şərh yazarkən bildirib.

Həmin paylaşımda "OpenAI"ın həmtəsisçilərindən biri, "Tesla"nın keçmiş süni intellekt və kompüter görməsi üzrə rəhbəri Andrey Karpatinin hazırladığı analizə istinad olunub.

Araşdırmada ABŞ iqtisadiyyatında 342 peşə süni intellekt və avtomatlaşdırma qarşısında həssaslıq baxımından 10 ballıq sistemlə qiymətləndirilib. Orta göstərici 5,3 bal olub.

İlon Mask bundan əvvəl də dəfələrlə bildirib ki, süni intellekt və robotlar gələcəkdə, demək olar ki, bütün iş yerlərini əvəz edəcək və iş könüllü fəaliyyətə çevriləcək.

Onun fikrincə, artıq 2026-cı ilin sonuna qədər süni intellekt hər hansı bir insandan daha ağıllı olacaq və yaxın beş il ərzində bəşəriyyətin kollektiv zəkasını da geridə qoya bilər.