İlon Maskdan yeni konsept | Nəqliyyat "hyperloop" dövrünə qədəm qoyur

Nəqliyyat “Hyperloop” erasına qədəm qoyur.

Bu sistemi ilk dəfə 2013-cü ildə İlon Maskın təqdim etdiyi konseptdə əks olunub.

Belə ki, konsept maqnit levitasiyası və aşağı hava müqaviməti texnologiyasını birləşdirir. Sistemin əsas məqsədi insanları və yükləri yüksək sürətlə, təhlükəsiz və ekoloji cəhətdən təmiz şəkildə daşımaqdır.

Polad və ya digər möhkəm materiallardan hazırlanmış borular az hava təzyiqi ilə doldurulur. Az təzyiq hava müqavimətini minimuma endirərək yüksək sürət əldə etməyə imkan verir.

Sərnişinlərin və ya yüklərin yerləşdiyi aerodinamik kapsullar maqnit sahəsi vasitəsilə boruların içərisində havada asılı vəziyyətdə hərəkət edir.

“Hyperloop” kapsulun relsə toxunmadan havada qalmasını təmin edən texnologiyadır. Bu, sürtünməni aradan qaldırır və daha yüksək sürət əldə etməyə imkan verir.

“Hyperloop” sistemləri enerji qənaətini maksimuma çatdırmaq üçün bərpa olunan enerji mənbələrindən istifadə etməyi hədəfləyir. Bu sistemlərin saatda 1000 km-ə qədər sürət yığması gözlənilir.

Los-Ancelesdən San-Fransiskoya təxminən 35 dəqiqəyə çatmaq mümkündür. Lakin çoxsaylı üstünlükləri ilə yanaşı, müəyyən qüsurları və çətinlikləri də az deyil. Hər şeydən əvvəl “Hyperloop” sistemlərinin tikintisi və texnologiyası çox yüksək maliyyə tələb edir.

Qeyd edək ki, “Hyperloop” texnologiyası üzrə ilk insanlı sınaq 2020-ci ilin noyabr ayının 8-də “Virgin Hyperloop” şirkəti tərəfindən həyata keçirilib. Bu tarixi sınaq layihənin texnoloji əsaslarını təsdiqləməklə yanaşı, “Hyperloop”un praktiki olaraq tətbiq oluna biləcəyini göstərən mühüm mərhələ olub.