İmran Xanın ikinci dəfə Nobel Sülh Mükafatına namizədliyi irəli sürüldü

02 aprel 2025 419 baxış

Pakistanın sabiq baş naziri, "Ədalət Uğrunda Hərəkat" müxalifət partiyasının qurucusu İmran Xan Nobel Sülh Mükafatına namizəd göstərilib.

Xarici medianın məlumatına görə, onun namizədliyini Pakistan Dünya İttifaqı adlı hüquq müdafiə təşkilatı keçmiş liderin ölkədə insan hüquqları və demokratik dəyərlərin müdafiəsinə verdiyi töhfəyə görə irəli sürüb.

İmran Xan artıq 2-ci dəfədir ki, Nobel Sülh Mükafatına namizəddir. 2019-cu ildə o, Hindistanla münasibətlərdə hərbi gərginliyin azaldılması istiqamətində göstərdiyi səylərə görə namizədliyə layiq görülüb.

Pakistan parlamenti sözügedən qərarı dəstəkləyən qətnamə qəbul edib. Lakin İmran Xan bu mükafata layiq olmadığını bildirib. Sabiq liderin sözlərinə görə, həmin titulu Kəşmir məsələsində yekun həllə nail olan siyasətçi almalıdır.

Xatırladaq ki, İmran Xan 2018-2022-ci illərdə Pakistanın baş naziri olub.

#İmran Xan