İmran Xanın müəmmalı ölümü ilə bağlı iddia | Sabiq baş nazirin bacıları nələri açıqladı?

Pakistanın sabiq baş naziri İmran Xanın həbsxanada ölməsi ilə bağlı xəbərlər yayılıb.

Bu informasiyanın fonunda onun 3 bacısının bəyanatları da səs-küyə səbəb olub.

Belə ki, onlar qardaşları İmran Xanla görüş tələb edərkən polisin hücumuna məruz qaldıqlarını bildiriblər.

İmran Xanın Norin, Alimə və Uzma adlı bacılarının sözlərinə görə, hadisə Adiala həbsxanasında qeydə alınıb. Belə ki, noyabrda İmran Xanla görüş qadağan edilib.

Məlumat üçün bildirək ki, İmran Xan 2023-cü ildən Adiala həbsxanasındadır. Onun ölümü və bacılarının şikayəti barədə xəbərlər isə Hindistan və Əfqanıstan saytlarında yayılıb.

Hər iki ölkə Pakistanla savaşdan sonra atəşkəs rejimindədir, amma gərginlik davam edir. Pakistanda törədilən terror aktlarının arxasında da bu iki ölkənin dəstəklədiyi Fitnə əl-Xəvaric qruplaşması dayanır. Yəni Kabil və Yeni Dehli hər yolla İslamabadda qarışıqlıq yaratmağa çalışır.

Ekspertlər düşünürlər ki, sabiq baş nazirin rəsmən təsdiqlənməyən ölüm xəbərinin tirajlanması da Pakistana qarşı informasiya müharibəsinin bir hissəsidir.