“İnsan sırf qidalanmaq naminə zövqlərdən uzaqlaşır” | Psixiatr

Həddindən artıq çəkidən əziyyət çəkən şəxslərdə zehni məhsuldarlıq aşağı düşür.

Bu barədə psixiatr Mixail Drobijev bildirib.

"Kökəlmək qan təzyiqinin yüksəlməsi və insult riskinin artması ilə nəticələnir. Həmçinin karbohidratla bol olan yeməklər qandakı şəkərin miqdarını qaldırır. Yüksək qlükoza isə insan beynində diqqət, yaddaş və mühakimə kimi koqnitiv funksiyaları tənzimləyən oreksin neyronlarının fəaliyyətini dayandırır. Nəticədə zehni aktivlik düşür və gümrah qalmaq çətinləşir. Qidalandıqdan sonra beyin dərin yuxu rejiminə keçir", – deyə mütəxəssis qeyd edib.

Bol karbohidratlı və yağlı yeməklərin qəbulu zamanı beyində xoşbəxtlik hormonu sayılan dopamin sərbəstləşir. Çox sayda insan bu cür qida dopaminindən asılı vəziyyətə düşür.

Piylənmədən əziyyət çəkənlərin reaksiyaları alkoqolizm vərdişləri olan şəxslərin davranışları ilə oxşar olur. Həddindən artıq çəkisi olan insanlarda bir sıra əlamətlər görünür: qidalanmaya qarşı qarşısıalınmaz istək, yemək prosesinə nəzarətin itirilməsi, porsiyaları kiçiltmək üçün edilən uğursuz cəhdlər, toxluq hissi üçün tələb olunan qida həcminin davamlı artması və yemək düşkünlüyü – insan sırf qidalanmaq naminə digər məşğuliyyət və zövqlərdən uzaqlaşır.