İran-İsrail savaşının miqyası genişlənir? | ABŞ onlara təklif edir ki...

ABŞ Prezidenti Donald Tramp İsrailin İrana qarşı hərbi əməliyyatına qoşulmağa qərar verərsə, İtaliya ABŞ-ni öz ərazisində hərbi bazalarla təmin edə bilər.

Bu barədə “La Repubblica” qəzeti İtaliya hökumətindəki mənbələrə istinadən xəbər yayıb. Ancaq məlumatda bildirilir ki, hələlik belə bir müraciət daxil olmayıb.

Nəşr qeyd edir ki, Roma ehtiyatlı davranır, çünki İraq və Livanda İtaliyanın hərbi kontingenti var və İran xəbərdarlıq edib ki, İsrailə dəstək veriləcəyi təqdirdə digər dövlətlərin bazalarının hədəfə alınması mümkün ssenarilər sırasındadır.

Yazıda qeyd olunub ki, son qərarı Roma versə də, İtaliya hökuməti Vaşinqtona “yox” deyə bilməyəcək. Bu halda söhbət NATO-nun Aviyano, Viçenza, Neapol və Siciliya adasında yerləşən bazalarından gedir.

Kanadada keçirilən G7 sammitindən sonra təşkil olunan mətbuat konfransı zamanı İtaliyanın Baş naziri Ciorcia Meloni bazalardan mümkün istifadə ilə bağlı sualı cavablandırmaqdan yayınıb.

“Vəziyyəti vaxtı gələndə dəyərləndirəcəyik. Belə qərarlar dərhal verilmir”, ‒ deyə C.Meloni bildirib.