İran katerləri ölkəyə yaxın su hövzəsində üzən ABŞ tankerinə yaxınlaşdı

İranın silahlı katerləri Oman sahillərinin şimalında, Hörmüz boğazında ABŞ bayrağı altında üzən “Stena Imperative” tankerinə yaxınlaşıb.

Bu barədə dənizçilik mənbələri və risklərin idarə edilməsi üzrə ixtisaslaşmış qurum məlumat yayıb.

Məlumata görə, İran katerləri tankerdən mühərriki söndürməyi və yoxlama üçün hazırlaşmağı tələb etsələr də, tanker sürətini artıraraq yoluna davam edib.

Bildirilir ki, gəmi İranın daxili ərazi sularına daxil olmayıb və ABŞ hərbi gəmisi tərəfindən müşayiət olunub. ABŞ rəsmisi də tankerin ABŞ bayrağı altında üzməsini təsdiqləyib.

Bundan əvvəl Böyük Britaniyanın Dəniz Ticarət Əməliyyatları xidməti Oman sahillərindən təxminən 16 dəniz mili şimalda silahlı katerlər qrupunun bir gəmini ələ keçirməyə cəhd göstərdiyini açıqlayıb. Qurum hadisənin Hörmüz boğazının giriş hissəsində baş verdiyini və araşdırıldığını bildirib.

İranın yarırəsmi “Fars” agentliyi isə adını açıqlamadığı rəsmi şəxslərə istinadla xəbər verib ki, bir gəmi lazımi hüquqi icazələr olmadan İranın ərazi sularına daxil olub, xəbərdarlıq edilib və “xüsusi təhlükəsizlik insidenti baş vermədən” ərazini tərk edib.