İran şərtlərini bütün dünyaya elan etdi | ABŞ necə reaksiya verəcək?

ABŞ və İran arasında danışıqların davam etdiyi müddətdə İran uranın zənginləşdirilməsi üzrə fəaliyyətini dayandırmayacaq.

Belə bir bəyanatla Tehran Dialoq Forumunda İranın xarici işlər naziri Abbas Əraqçı çıxış edib.

ABŞ Prezidenti Trampın xüsusi nümayəndəsi Stiv Uitkofun İrana nüvə silahı yaradılmasına imkan verilməyəcək bəyanatını şərh edən iranlı nazir deyib: "Bu açıqlamalar danışıqların reallığından tamamilə uzaqdır və zənginləşdirmə davam edəcək".

Əraqçı əlavə edib ki, əgər onların məqsədi nüvə silahı istehsalının qarşısını almaqdırsa, İran hazırdır: “Amma real olmayan tələbləri varsa, təbii ki, yerinə yetirilməyəcək”.

O eyni zamanda Tehranın danışıqların gələcək perspektivi ilə bağlı mövqeyini də açıqlayaraq bildirib ki, qeyri-real gözləntilər olacaqsa, ABŞ ilə danışıqlar dayandırılacaq.

İranın uranın zənginləşdirilməsi fəaliyyətlərinin dayandırıla bilməyəcəyini deyən Əraqçı bildirib: "Bu, İran xalqının mübahisəsiz haqqıdır. Bu, İran xalqının çox çalışdığı və nüvə alimlərimizin qanı da daxil olmaqla, ağır bədəl ödədiyi böyük bir elmi nailiyyətdir".