İrana qarşı dəniz blokadası tətbiq ediləcək? | Trampdan Tehrana xəbərdarlıq - Baku TV

ABŞ Prezidenti Donald Tramp İrana qarşı dəniz blokadası tətbiq edilə biləcəyi barədə məqalə paylaşıb.

İslamabadda ABŞ-İran danışıqları razılaşma olmadan başa çatdıqdan sonra Donald Tramp “Truth Social” platformasında İranın ABŞ-nin tələblərini qəbul etməyəcəyi təqdirdə Vaşinqtonun dəniz blokadası tətbiq edə biləcəyini bildirib.

“Just The News” nəşrində dərc olunan “Əgər İran geri çəkilməsə, Prezidentin əlindəki Tramp kartı: dəniz blokadası” başlıqlı məqalədə qeyd olunur ki, belə bir addım bu ölkənin iqtisadiyyatına ciddi şəkildə təsir edər və İranın neft ixracından asılı olan Çin və Hindistan kimi ölkələrə də təzyiqi artırar.

Məqalədə həmçinin bildirilir ki, Donald Trampın belə bir addımı onun əvvəlki uğurlu blokada strategiyasını təkrarlaya bilər.

Vurğulanır ki, bundan əvvəl tətbiq edilən dəniz blokadası Venesuela iqtisadiyyatını çökdürüb və 2026-cı ilin yanvarında Venesuela lideri Nikolas Maduronun ABŞ tərəfindən ələ keçirilməsi ilə nəticələnib.