İranda gərginlik pik həddə çatır | SEPAH-ın iki əməkdaşı öldürüldü - Baku TV

İranın qərbində yerləşən Kermanşah şəhərində baş verən iğtişaşlar zamanı İslam İnqilabı Keşikçiləri Korpusunun iki hərbi qulluqçusu öldürülüb.

Möhsən Cəmali və Məhəmməd Şeydai etirazçılarla toqquşmalar zamanı həlak olublar.

İranda hazırda ölkə miqyasında internet kəsintisi müşahidə olunur. Bu barədə internet monitorinq qrupu “NetBlocks” “X” sosial şəbəkəsində məlumat yayıb.

Qeyd olunub ki, hadisə ölkə daxilində etirazları hədəf alan və son dövrlərdə tətbiq edilən bir sıra rəqəmsal senzura tədbirlərindən sonra baş verib. Bildirilib ki, internet kəsintisi ictimaiyyətin kritik anda ünsiyyət qurmaq hüququna ciddi maneə yaradır.

Bu arada, ABŞ Prezidenti Donald Tramp İran şahının oğlu Rza Pəhləvi ilə mümkün görüşə münasibət bildirib. O qeyd edib ki, Pəhləvini izləyib və onun yaxşı insan təsiri bağışladığını düşünür, lakin hazırkı mərhələdə prezident kimi onunla görüşməyin uyğun olub-olmadığına əmin deyil.

Qeyd edək ki, İranda iqtisadi böhranın yaratdığı etirazlar dalğası artıq 12-ci gündür ki, davam edir.