İranda hücumlar nəticəsində ölənlərin sayı 500-ü ötdü - Baku TV

İranın cənubundakı Fars əyalətində martın 2-si gecə boyu partlayışlar baş verib.

“Al Jazeera” xəbər verir ki, ABŞ və İsrailin İranın cənubundakı Fars əyalətinə hücumları nəticəsində ən azı 35 nəfər həlak olub.

İran Qızıl Aypara Cəmiyyəti bildirib ki, ABŞ-İsrail hücumları nəticəsində ölkə daxilində həlak olanların sayı 550-ni ötüb.

Artıq günlərdir ki, İranda internet kəsintiləri davam edir. “Netblocks” bildirib ki, ABŞ və İsrailin hücumları davam etdiyinə görə İranda internet kəsintiləri 48 saatı keçib.

İranın “Shahed-136” dronları Səudiyyə Ərəbistanının Ras-Tanura şəhərində “Saudi Aramco” şirkətinin ən böyük neft emalı zavoduna hücum edib. Yayılan görüntülərdə zavodun ərazisində güclü partlayışlar və yanğınlar müşahidə edilib.

Səudiyyə Ərəbistanının Müdafiə Nazirliyindən “Əl-Ərəbiyyə” telekanalına açıqlama verilib ki, obyektdə iki dron vurulub. Xəsarət alan olmayıb. Ras-Tanura ehtiyat tədbiri olaraq bağlanıb və vəziyyət nəzarət altındadır.