İranda polis məntəqəsinə silahlı hücum | PUA-lar havaya qalxdı

İranın etnik bəlucların yaşadığı Sistan və Bəlucistan əyalətinin Rask şəhərinin polis məntəqəsinə silahlı hücum olub.

Bu barədə sosial şəbəkələrdə məlumat verilib. Bildirilib ki, dekabrın 15-i gecə 2 radələrindən başlayan silahlı hücum zamanı polis bölməsində güclü partlayışlar olub. Şəhərə çox sayda xüsusi qüvvələrin yeridildiyi, kəşfiyyat PUA-larının havaya qaldırıldığı qeyd olunub.

Bəlucların “Ceyşül Ədl” silahlı qruplaşması hücumun məsuliyyətini üzərinə götürüb.

“Allahın Ədalət Fədailərinin Strateji Batalyonu”ndakı qüvvələri bu gecə saat 2-də Rask polis qüvvələrinin qərargahına hücum edib”, – deyə silahlı qruplaşmanın yaydığı məlumatda bildirib.

İranın polis komandanlığı yerli vaxtla səhər saat 07:53-də hadisəni təsdiqləyib. Bildirilib ki, terror hücumu nəticəsində 12 polis həyatını itirib və bir neçə əməkdaş xəsarət alıb. hücum edənlərin bir neçəsi öldürülüb və yaralanıb.