İranda qətlə yetirilən İsmayıl Haniyə haqqında bilinməyənlər

HƏMAS hərbi qruplaşmasının Siyasi Bürosunun rəhbəri İsmayıl Haniyə İran Prezidenti Məsud Pezeşkianın andiçmə mərasimində iştirak etdikdən sonra iqamətgahına edilən raket hücumu nəticəsində həlak olub. Öldürülən İsmayıl Haniyə kimdir?

İsmayıl Haniyə 1962-ci ildə Qəzzanın şimalında qaçqın düşərgələrindən birində anadan olub.

O, BMT-nin Fələstindəki nümayəndəliyinin nəzarətində olan məktəblərdən birində təhsil alıb. Daha sonra o, həbs edilib və 1980-1990-cı illərdə həbsxanada olub. Hakimiyyətə gəlməsinə isə HƏMAS-ın qurucusu Şeyx Yasin kömək edib. Onların hər ikisini birləşdirən bir məqam var idi: 2003-cü ildə İsrailin əsas hədəflərindən biri olmaları. Şeyx Yasinin öldürülməsindən sonra Haniyə izdihama “Ağlamaq lazım deyil. Səbrli və qisas almağa hazır olmalısınız” deyə çağırış edib.

Beynəlxalq Cinayət Məhkəməsinin axtarışa verdiyi və haqqında həbs qərarı istənilən Haniyə müharibə cinayətlərində də ittiham edilib. Hərbi qruplaşmanın müharibə danışıqlarını yönləndirən və diplomatiyada böyük rol oynayan Haniyə son 2 onillik ərzində HƏMAS-ın yüksəksəviyyəli liderlərindən biri olub.

Bununla yanaşı, silahlı qrupun hərbi əməliyyatlarını da idarə edib.

2006-cı ildən HƏMAS-a rəhbərlik edən Haniyə əvvəllər Fələstinin Baş naziri olub. 2017-ci ildə təşkilatın siyasi bürosuna lider seçilib. O, Qətər və Türkiyədə yaşasa da, təşkilatı elə oradan idarə edib. Sözügedən şəxs Misir və ABŞ-nin vasitəçiliyi ilə girovların qaytarılması üzrə danışıqlarda iştirak edənlərin arasında olub.