İranda vəziyyət gərginləşib | Polis etirazçılara ultimatum verdi - Baku TV

İranda etiraz aksiyaları davam edir.

Abdananda hökumət qüvvələrinin polis bölməsində sığındığı bildirilir. Etirazçılar İranın Ali Rəhbərinə qarşı şüarlar səsləndiriblər.

İranın polis qüvvələrinin komandiri Əhmədrza Radan iddia edib ki, onun "iğtişaşçılar" adlandırdığı insanların çoxu hökumət kəşfiyyat xidmətləri tərəfindən müəyyən edilərək həbs olunub.

Ölkədə sahibkarların etirazları zamanı Əhmədrza Radan bütün etirazçıların İslam Respublikasının təhlükəsizlik xidmətləri tərəfindən nəzarət altında olduğunu və harada olmalarından asılı olmayaraq həbs olunacağını bildirib. Bununla belə, o, indiyə qədər etirazlarda iştirak edən insanları hüquq-mühafizə orqanlarına "təslim olmağa" çağırıb.

İranın polis qüvvələrinin komandanı həmçinin bildirib ki, könüllü təslim olanlar İslam Respublikasının mərhəmətinə nail olacaqlar.

Qeyd edək ki, Tehran bazarında etirazlardan sonra gərginlik pik həddə çatıb. Nümayiş zamanı yaralananların sayı barədə dəqiq məlumat yoxdur.

Bildirilib ki, Tehrandakı bazarlarda gözyaşardıcı qazdan istifadə əvvəllər də qeydə alınıb və sosial mediada paylaşılan videolarla təsdiqlənib.

Sahibkarlar bazarlarda toplandıqlarını və fəaliyyətlərini dayandırdıqlarını bildiriblər, lakin təhlükəsizlik qüvvələrinin müdaxiləsi gərginliyi artırıb.