İrandan İsrailə sərt xəbərdarlıq | Ara getdikcə qızışır

“İranın İsrailə cavab verməyə yetəcək qədər gücü və arsenalı var”.

Bunu İranın xarici işlər naziri Hüseyn Əmir Abdullahian CNN telekanalına verdiyi müsahibəsində deyib.

Ölkəsinin regionda müharibənin genişlənməsinin əleyhinə olduğunu dilə gətirən nazir savaş istəmədiklərini, amma hər an cavab verməyə hazır olduqlarını vurğulayıb:

“İran İsrailə hücum edərək yəhudi dövlətinin hökumətinə siqnal göndərmək istəyirdi ki, Tehranın qisas almaq imkanı var. Mən bir daha təkrar edirəm: biz regionda xaosun, müharibənin və gərginliyin genişlənməsinin əleyhinəyik. İsrail rejimi avantüraya əl atsa və İranın maraqlarına qarşı tədbirlər görsə, bizim cavabımız dərhal və maksimum səviyyədə olacaq. 13 aprel hücumu “məhdud xarakter daşıyır və minimum çərçivədən kənara çıxmayıb. Biz İsrailə daha sərt cavab verə bilərdik”.

Müsahibəsinin sonunda H.Ə.Abdullahian kiçik bir xatırlatma da verib. Qeyd edib ki, rəsmi Tehran Vaşinqtona dəfələrlə xəbərdarlıq edərək bildirib ki, əgər İsrail yenidən ciddi səhvə yol verərsə, növbəti cavab yəhudi dövləti üçün güclü, dəqiq və kədərli olacaq.