İranın 8 neft tankeri saxlanılıb

ABŞ-nin İrana qarşı hərbi əməliyyat xərcləri təxminən 40 günlük aktiv döyüş əməliyyatlarından sonra 51,2 milyard dolları ötüb.

Bu göstəricilər real vaxt rejimində izləmə resursu "Iran War Cost Tracker" portalında yer alıb və Pentaqonun martın 10-da ABŞ Konqresi üçün keçirdiyi brifinqdən əldə edilən məlumatlara əsaslanır.

Brifinq zamanı bildirilib ki, Vaşinqton Yaxın Şərqdəki döyüş əməliyyatlarının ilk altı günündə 11,3 milyard dollar xərcləyib və münaqişənin hər sonrakı günü üçün təxminən 1 milyard dollar xərcləməyi planlaşdırıb.

Qeyd olunur ki, bu rəqəmə qoşunların köçürülməsi və hərbi texnikanın bərpası kimi müəyyən xərclər daxil olmaya bilər. Buna görə də faktiki xərclərin xeyli yüksək olması istisna edilmir.

Bundan başqa, ABŞ-nin Hərbi Dəniz Qüvvələri İranın dəniz blokadası tətbiq ediləndən bəri İslam Respublikasındakı limanlara girməyə və ya çıxmağa çalışan səkkiz neft tankerini saxlayıb. Bu barədə "The Wall Street Journal" qəzeti ABŞ administrasiyasına istinadən məlumat yayıb.

Nəşr bildirib ki, ABŞ hərbçiləri radiokanal vasitəsilə ticarət gəmiləri ilə əlaqə saxlayıb və onlardan marşrutlarını dəyişmələrini tələb edib. Bütün tankerlər tələblərə əməl edib.

Məlumata görə, ABŞ İrana dəniz blokadasını tətbiq etmək üçün 15 hərbi gəmi və bir neçə min hərbi qulluqçu yerləşdirib.