İranın gizli əməliyyatı Meksikada dayandırıldı

İranın xüsusi xidmət orqanları Meksikada İsrail səfirinə qarşı sui-qəsd hazırlayıb.

İsrail Xarici İşlər Nazirliyi ölkənin Meksikadakı səfiri Eynat Krans-Neygerə sui-qəsd planlaşdıran terror qrupunu ifşa etdiyinə görə bu ölkənin təhlükəsizlik xidmətlərinə təşəkkür edib.

Bu barədə ABŞ və İsrailin adı açıqlanmayan rəsmilərinə istinadən “Axios” portalı məlumat yayıb.

Portalın verdiyi məlumata görə, sui-qəsd planı İran İslam İnqilabı Keşikçiləri Korpusunun xüsusi təyinatlı “Əl-Qüds” birliyi tərəfindən hazırlanıb.

Bildirilir ki, planın icrasına 2024-cü ilin sonunda başlanılıb və proses 2025-ci ilin ilk yarısında davam edib. Hədəf Meksikadakı İsrail səfiri Eynat Krants-Nayger olub.

"Sui-qəsdin qarşısı alınıb və diplomat üçün hazırda heç bir təhlükə yoxdur", ‒ deyə məlumatda qeyd olunub.

Portalın iddiasına görə, Meksika xüsusi xidmət orqanları bu sui-qəsdin qarşısını yay aylarında alıblar.

Qeyd edək ki, sui-qəsd bir neçə ay əvvəl ifşa olunub, lakin bu barədə məlumat yalnız indi açıqlanıb.