İranla Əfqanıstan arasında su davası

İranla Əfqanıstan arasında sərhəddə yerləşən Hilmənd çayının su ehtiyatından istifadə üstündə münaqişə yenidən qızışıb. Artıq neçə gündür ki, hər iki ölkənin təmsilçiləri arasında söz atışması davam edir.

Gərginlik ondan başlayıb ki, ötən həftənin sonlarında İran Prezidenti İbrahim Rəisi Əfqanıstanla həmsərhəd Sistan və Bəlucistan əyalətinə səfəri zamanı bölgənin su təminatı ilə bağlı Taliban hökumətinə hədələyici tonda müraciət edib.

“Əfqanıstan hakimiyyətinə demək istəyirəm ki, mənim söylədiklərimə adi baxmasınlar, buna çox ciddi yanaşsınlar. Mən Əfqanıstanın rəsmilərinə və hakimiyyətinə xəbərdarlıq edirəm ki, gecikdirmədən Sistan və Bəlucistan əyaləti və əhalisinin haqqını versinlər”, – deyə İran lideri qeyd edib.

İ.Rəisi Əfqanıstan tərəfdə Hilmənd çayı üzərində tikilən bənddə su olmadığı barədə qarşı tərəfin açıqlamalarına da münasibət bildirib.

“Yubanmadan bizim mütəxəssislərə imkan yaradılmalıdır ki, məsələni araşdırsınlar. Əgər bizim mütəxəssislər bunu təsdiq etsələr, çox yaxşı, problem yoxdur, suyun olmamasına biz bir şey demirik. Amma əgər su varsa, Sistan və Bəlucistan əhalisinin payı verilməlidir. Biz insanların haqqının pozulmasına imkan vermərik”, – deyə İran lideri əlavə edib.