İranla müharibə ABŞ-yə neçəyə başa gəlib? - Heyrətə gətirən detallar üzə çıxdı - Baku TV

ABŞ Müharibə Nazirliyi İrana qarşı hərbi əməliyyatların aparılmasına təqribən 40 milyard dollar xərcləyib.

Bu barədə CNN telekanalı Strateji və Beynəlxalq Tədqiqatlar Mərkəzinin hələ dərc olunmamış araşdırmasına istinadən məlumat yayıb.

Mərkəzin baş məsləhətçisi Mark Kansianın məlumatına görə, qeyd olunan xərclər istifadə olunmuş döyüş sursatlarının, sıradan çıxarılmış avadanlıqların və Amerika hərbi obyektlərinə dəymiş ziyanın dəyərini əhatə edir. Bununla belə, bu məbləğə qurumun 2026-cı maliyyə ili üçün büdcəsində artıq nəzərdə tutulmuş əməliyyat xərcləri daxil edilməyib.

Strateji və Beynəlxalq Tədqiqatlar Mərkəzinin məlumatları göstərir ki, Pentaqon maliyyə xərclərinin əsas yükünü öz üzərinə götürməsinə baxmayaraq, münaqişə digər dövlət qurumlarından, xüsusən də Daxili Təhlükəsizlik Nazirliyi və Veteranlarla İş Nazirliyindən əlavə olaraq 1 milyard dollar məbləğində xərc tələb edib.

May ayında müdafiə qurumu senatın Silahlı Qüvvələr Komitəsinə hesabat təqdim edib və bu hesabata əsasən, döyüş əməliyyatlarının aparılması üçün ümumi xərclər 29 milyard dollara çatıb. Bu məbləğə zəruri təmir işləri, hərbi texnikanın bərpası və əvəz edilməsi xərcləri, eləcə də ümumi əməliyyat xərcləri daxil edilib.