İslamabadda ABŞ-İran arasında danışıqların növbəti raundu baş tutacaq? - Baku TV

İranın xarici işlər naziri Abbas Əraqçi Pakistana səfəri çərçivəsində ABŞ nümayəndələri ilə görüş keçirməyi planlaşdırmır.

Bu barədə “Tasnim” agentliyi məlumat yayıb.

Qeyd olunur ki, Əraqçinin İslamabada səfəri ABŞ ilə danışıqlarla bağlı deyil, Pakistan tərəfi ilə ikitərəfli münasibətlər və regiondakı vəziyyətin müzakirəsinə həsr olunacaq. Səfərin diplomatik məsləhətləşmələr xarakteri daşıdığı vurğulanır.

Agentlik həmçinin İranın danışıqlar aparmaq üçün ABŞ-yə müraciət etmədiyini qeyd edib. Bildirilib ki, Ağ Ev sözçüsü Karolayn Levittin İran rəsmilərinin ABŞ ilə təmasa keçərək Pakistanda birbaşa danışıqlar tələbi irəli sürməsi iddiaları yalandır.

Qeyd edək ki, Pakistan Xarici İşlər Nazirliyinin İranın Xarici İşlər Nazirliyinin rəhbəri Abbas Əraqçinin bu ölkəyə səfərinə dair açıqladığı proqramda isə ABŞ tərəfi ilə danışıqlarla bağlı məlumat yer almayıb.

Əlavə edək ki, daha əvvəl Amerikanın "Axios" portalı aprelin 27-də İslamabadda İran və ABŞ arasında danışıqların növbəti raundunun keçiriləcəyi barədə məlumat yayıb.