İspaniya və Portuqaliyada əhali təxliyə olundu

Leonardo fırtınası İspaniya və Portuqaliyada dağıntılara səbəb olub.

Baş verən daşqınlar səbəbilə Xeres və Kortes de la Frontera bölgələrində ümumilikdə 3500 sakin təxliyə edilib.

Təbii fəlakət nəticəsində 1 nəfərin öldüyü 1 nəfərin isə itkin düşdüyü bildirilir. Hazırda ən təhlükəli ərazilərə Qrazalema, Kampo de Cəbəllütariq, Ronda və Xaenin bəzi hissələri daxildir.

İspaniya hökuməti bildirib ki, vəziyyət pisləşərsə, təhlükəsizliyi qorumaq məqsədilə torpaq sürüşməsi və daşqınların daha çox baş verə biləcəyi riskli ərazilərdən əhali təxliyə ediləcək.

Qeyd edək ki, İspaniyada ötən ay 119,3 mm yağıntı qeydə alınıb ki, bu da 1992-2020-ci illər üzrə orta göstəricidən 85% çoxdur.

Bu, XXI əsrin ikinci ən yağışlı yanvar ayı hesab olunur. Hidrometereologiya xidməti isə bildirib ki, İspaniyanın mərkəzi hissəsində, Əndəlüsdə və Qalisiyada güclü və davamlı yağışlar fevralın 7-nə qədər davam edəcək.

Əlavə edək ki, Leo fırtınası 2026-cı ilin əvvəlindən bəri İspaniya və Portuqaliyanı vuran altıncı qış fırtınasıdır. Ondan əvvəl baş verən Kristin fırtınası altı nəfərin ölümünə, minlərlə insanın isə işıqsız qalmasına səbəb olmuşdu.