İspaniyadakı mağaza sahibindən maraqlı addım

İspaniyanın Barselona şəhərində yerləşən məşhur suvenir mağazası maraqlı addım atıb.

Belə ki, mağazaya sadəcə baxmaq üçün gedən turistlər 5 avro məbləğində pul ödəməlidirlər. Bu barədə İsveçin “The Local” nəşri məlumat verib.

Mağaza sahibinin sözlərinə görə, hər gün dükana çox sayda turist daxil olsa da, onların əksəriyyəti heç nə almır. Müştərilər adətən içəridəki suvenirlərə tamaşa edir və qapıda lazımsız növbə yaradırlar. Bu problemin qarşısını almaq üçün isə mağaza sahibi ziyarətçilərdən 5 avro tələb edir.

Mağazanın meneceri Toni Merino bildirib ki, onların məqsədi turistlərdən pul almaq deyil. Görülən tədbir nəticəsində isə mağazaya baxanların sayı xeyli azalıb.

Qeyd edək ki, 125 illik tarixi olan mağazanın bu addımı sosial şəbəkələrdə müzakirəyə çıxarılıb və birmənalı qarşılanmayıb. İstifadəçilər bu təşəbbüsü dəstəkləməyib və rəhbərliyi acgözlükdə ittiham edib. Sosial şəbəkələrdəki tənqidlərə baxmayaraq, mağaza sahibi yeni qaydadan imtina etməyəcəyini bildirib.