İsrail Cenindəki qaçqın düşərgəsi və xəstəxanaya hücum edib?

İsrail Ordusu Cenin şəhərinə və orada yerləşən qaçqın düşərgəsinə avia zərbələr endirib. Nəticədə 3 fələstinlinin həlak olduğu, xeyli sayda insanın yaralandığı bildirilir.

Ölkə mətbuatının yaydığı xəbərə görə, İsrail Ordusu böyük bir dəstəsini, eyni zamanda 80 zirehli texnikasını Cenin şəhərinə və qaçqın düşərgəsinə yerləşdirib.

ŞAFA xəbər agentliyinin məlumatına görə isə Düşərgəyə yaxın ərazidə yerləşən İbn Sina xəstəxanasının həkimləri girov götürülüb. “Ramallah şəhərinin qərbindəki Nilin qəsəbəsində İsrail hərbiçiləri bir neçə evə basqın edərək 28 nəfəri həbs edib”, – deyə xəbərdə bildirilib.

Fələstinin “Wafa” xəbər agentliyi isə İsraili yaralılara təcili yardım çatdırılmasına mane olmaqda ittiham edib.

Məlumata görə, İsrail Ordusunun nəzarəti altında olan Cenin qaçqın düşərgəsinə günlərdir davam edən PUA hücumlarından sonra xeyli sayda yaralanan fələstinlilərə tibbi yardımın çatdırılması mümkünsüz olub. SAXAL hərbçiləri düşərgəyə gedən əsas yollara nəzarəti ələ aldıqdan sonra fələstinli həkim briqadası əraziyə buraxılmayıb.