İsrail-Fələstin müharibəsinə Bella Hadiddən reaksiya: Ölənlər üçün yas tuturam

Fələstin əsilli məşhur amerikalı model Bella Hadid yenidən sosial media hesabında Fələstin-İsrail münaqişəsinə münasibət bildirib.

“Daily mail”in məlumatına görə, model yenidən Fələstinə dəstəyini ifadə edib: “Dünyanın diqqətini onilliklər ərzində günahsız insanların həyatına son qoyan və ailələri məhv edən vəziyyətə yenidən cəlb edən bu çətin və dəhşətli son iki həftəni təsvir etmək üçün hələ doğru sözləri tapa bilməmişəm. Deyəcəyim çox şey var, amma bu gün qısa yazacağam”.

Bella qeyd edib ki, ailəsi təhdidlərlə üzləşsə də, bu, onun mövqeyinə mane olmayacaq: “Hər gün yüzlərlə ölüm təhdidləri aldım, telefon nömrəm oğurlandı, ailəm təhlükədə idi. Amma mən artıq susa bilmirəm. Qorxu həll yolu deyil. Fələstin xalqı və övladları, xüsusən də Qəzza zolağında bizim susmağımıza dözə bilməz. Əsl cəsarətli biz yox, onlardırlar.

Qəzza zolağında hava hücumları nəticəsində övladlarını itirən bütün analar və tək ağlayan uşaqlar, bütün itkin atalar, qardaşlar, bacılar, əmilər, xalalar, dostlarla birlikdə yas tuturam. Ölkənin tarixindən asılı olmayaraq, harada olursa, olsun, hər hansı mülki vətəndaşa qarşı terror hücumlarını pisləyirəm”.

Qeyd edək ki, Bellanın bacısı Cici Hadid və atası Məhəmməd də Fələstini dəstəklədiklərini ifadə edən paylaşımlar yayımlayıb.