İsrail Ordusu “Əl-Şifa” xəstəxanasını boşaltdı | Qəzzada son vəziyyət

İsrail Müdafiə Qüvvələri Qəzza zolağında hərbi əməliyyat keçirdikdən sonra “Əl-Şifa” tibb kompleksini tərk ediblər.

Təxminən 2 həftə davam edən əməliyyatlardan sonra ərazidə yerləşən ən böyük xəstəxana tamamilə boşaldılıb.

Qeyd edək ki, İsrail Müdafiə Qüvvələri HƏMAS hərbi qruplaşmasının döyüşçülərinin “Əl-Şifa” xəstəxanasında gizləndiyini və oradan hərbi təyinat obyekti kimi istifadə etdiklərini iddia edib. Sözügedən iddianı bəhanə edərək ordu noyabrın 15-də xəstəxana ərazisində hərbi əməliyyata başlayıb. Müdafiə Qüvvələri mülki şəxslərin xəsarət almaması üçün orduda xüsusi təlim keçmiş tibbi qrupların və ərəbdilli şəxslərin olduğunu da vurğulayıb.

Ərəb mediasının yaydığı məlumata görə isə tibb kompleksinin korpusları hücumlar nəticəsində yararsız hala düşüb, dağıntıların miqyası həddindən artıq böyükdür.

Bundan əlavə, 3000 nəfərlik tutumu olan tibb kompleksində İsrailin həyata keçirdiyi hərbi əməliyyatlar nəticəsində həlak olan mülki şəxslərin sayı 400-ü keçib. Onların arasında Fələstin Qızılxaç Cəmiyyətinin üzvləri də var. Beləliklə, Fələstin tərəfi israilin qəsdən sözügedən xəstəxananı hədəf aldığını və əsas məqsədinin də mülki şəxsləri öldürmək olduğunu iddia edib.

Bütün bunların fonunda isə müdafiə ordusu “Əl-Şifa”da HƏMAS üzvlərinə qarşı mübarizə apardığını vurğulayıb. Nəticədə isə Qəzzada yerləşən ən böyük tibb kompleksi yerləyeksan olub. Hazırda sözügedən məkan tanınmaz vəziyyətdədir.