İsrail Ordusu sözündən geri döndü | Livan məsələ ilə bağlı hərəkətə keçdi

“Livan öz torpaqlarında İsrailin hərbi mövcudluğunun bu və ya digər şəkildə qalmasını işğal kimi qiymətləndirir. Bununla yanaşı, İsrailin tamamilə geri çəkilməsi üçün sahib olduğu bütün imkanlardan istifadə hüququna malikdir”.

Bu barədə Livanın Prezident Aparatının sözçüsü Nəcat Şərafəddin bildirib.

O vurğulayıb ki, ABŞ-nin vasitəçiliyi ilə 2024-cü ildə imzalanan atəşkəs sazişinə əsasən, İsrail Ordusu 18 fevral tarixində Livan torpaqlarından tamamilə çıxmalıdır.

Lakin İsrail Silahlı Qüvvələri sözügedən şərti yerinə yetirsə də, daha sonra “Hizbullah” hərbi qruplaşmasının təhlükəsinə qarşı 5 strateji nöqtədə qoşunlarını saxlamağa qərar verib. Bu qərarı Təl-Əvivin müdafiə naziri İsrael Katz özü açıqlayıb.

Livan rəsmisi isə bildirib ki, ölkə Prezidenti Cozef Aun, Baş nazir Nəvvaf Səlam və parlament sədri Nəbih Berri arasında görüş baş tutub. İclas zamanı İsrail Ordusunun Livanda qalması məsələsi müzakirə olunub.

“Livan Ordusu sərhədlər boyunca bütün vəzifələrini yerinə yetirməyə hazırdır. Həmçinin İsrailin atəşkəsi pozma halları ilə əlaqədar Birləşmiş Millətlər Təşilatının Təhlükəsizlik Şurasına da müraciət ünvanlayacağıq”, – deyə açıqlamada vurğulanıb.

Xatırladaq ki, 2024-cü il noyabrın 27-də 2 ölkə arasında atəşkəs sazişi imzalanıb. Razılaşmaya əsasən, İsrail Ordusuna ölkədən çıxması üçün 60 gün vaxt verilib. Həmin müddət yanvarın 26-da bitsə də, Təl-Əviv daha 30 gün möhlət istəyib. Möhlət fevralın 18-də başa çatıb.