İsrail Suriyada Türkiyənin kök salmağının qarşısını ala biləcək? | Sensasiyalı məqalənin detalları

“İsrail Ordusunun aprelin 2-dən 3-nə keçən gecə Suriyada həyata keçirdiyi hava hücumları həm də bu ölkədə möhkəmlənməyə çalışan Türkiyəyə xəbərdarlıqdır”.

Bu barədə “Yerusəlim Post” yazır.

“İsrail Ankaranın Suriyada dərinə kök salmaq cəhdinin qarşısını almaq istəyir. Belə addımlar Türkiyəni çəkindirmək üçün bir vasitə ola bilər. Sual budur ki, bu işə yarayacaqmı?

İsrail Suriyada İranla qarşılaşmaq üçün çox gözlədi. Suriya vətəndaş müharibəsi zamanı İran Suriyaya qoşun yeritdi. Daha sonra “Hizbullah” və İraqdakı yaraqlılar onun ardınca getdi.

İran “Hizbullah”a silah daşımaq üçün Suriya üzərindən quru dəhlizindən istifadə etdi. Bu möhkəmlənmə İsrail üçün təhlükə yaratmışdı. Artıq İran Suriyadan çəkilib, bu, yaxşı xəbərdir”, − İsrail nəşri bildirir.

“Yerusəlim Post”un fikrincə, İranın geri çəkilməsindən sonra İsrail Suriyada Türkiyə ilə üz-üzə qalıb, amma Ankara ilə qarşılaşmaq Tehranla müqayisədə daha risklidir:

“Türkiyə İran kimi deyil. Türkiyə NATO üzvüdür. Onun güclü iqtisadiyyatı, Rusiya və Qərblə yaxşı əlaqələri var. İranla da işləyir. Ankaranın güclü hərbi müdafiə sektoru var. İrandan fərqli olaraq onun güclü şərti ordusu var və etibarlı hərbi texnika istehsal edir. İran isə əksinə, pilotsuz təyyarələrə, ballistik raketlərə və nüvə proqramına malik olsa da, daha zəifdir. Suriyada Ankara ilə qarşıdurma İranla qarşıdurmadan daha mürəkkəb ola bilər”.