İsrail və İran bir-birinin ərazilərinə qarşılıqlı zərbələr endiriblər

İran tərəfindən atılan raketlərdən biri Təl-Əvivdə hündürmərtəbəli binaya düşüb. Nəticədə tikili tamamilə çöküb. Uçqunların altında insanların qaldığı ehtimal olunur.

Bu barədə İsrailin Daxili Cəbhə Komandanlığı məlumat yayıb.

Bildirilib ki, zərbələr paytaxtda ciddi dağıntılara səbəb olub. Təl-Əviv polisinin şəhərdə raket zərbələrinə məruz qalmış bölgələrdə axtarış-xilasetmə işləri apardığı vurğulanıb. İranın hücumu nəticəsində ümumilikdə 1 nəfər ölüb, 70-ə yaxın insan yaralanıb.

Bu arada, İranın Tehran şəhərində yerləşən Mehrabad Hava Limanında güclü partlayış olub. Bu barədə Qətərin “Əl-Cəzirə” kanalı məlumat yayıb. Partlayışın həcmi, dağıntılar və insan tələfatı ilə bağlı hər hansı bir məlumat verilməyib.

Digər bir xəbərə görə, İsrail ordusu İsfahan bölgəsindəki nüvə obyektinə hücum edib. İran tərəfindən hələ ki məsələ ilə bağlı heç bir açıqlama verilməyib.