İsraildən genişmiqyaslı hücum | Beynəlxalq təşkilatlar təcili hərəkətə keçdi

İordan çayının qərb sahilindəki yaşayış məntəqələri son illərin ən böyük hücumuna məruz qalıb.

Yerli medianın yaydığı məlumata görə, Nur Şəms adlı qaçqın düşərgəsinə endirilən zərbələr nəticəsində Tulkarem Batalyonunun komandiri Əbu Şucaa kimi tanınan Məhəmməd Cabir və daha dörd əsgər öldürülüb.

Hərbçilərin məsciddə gizləndiyini deyən İsrail ordusu açıqlayıb ki, sözügedən şəxs iyunda Qalkilyada 1 İsrail vətəndaşının öldürülməsi ilə sonlanan hücumu idarə edib.

Xəbərdə həmçinin qeyd olunub ki, İordan çayının qərb sahilində həyata keçirilən hücumlar azı 12 nəfərin həlak olması, 22 nəfərin yaralanması ilə nəticələnib. 20 şəxs isə həbs olunub.

“Human Rights Watch” təşkilatının keçmiş icraçı direktoru Kennet Ros İordan çayının qərb sahilinə hərbi müdaxiləni müharibə kimi qiymətləndirib. Onun sözlərinə görə, bu ərazilərdə hərbi əməliyyatı tənzimləyən hüquqi standartlar olmalıdır. Lakin İsrail ordusu bu standartlara əməl etmir.

Beynəlxalq “Amnesty International” təşkilatı da öz mövqeyini bildirməkdən çəkinməyib. Qurum bu hücumların fələstinlilərin həyatını riskə atdığını bildirib. Bundan əlavə, onsuz da acınacaqlı vəziyyətdə olan regionun yeni hərbi əməliyyatlarla daha ciddi itkilərlə üzləşəcəyi və məcburi köçkünlərin artacağı fikrini də ortaya atıb.

Artıq bölgədə xəstəxanalar mühasirəyə alınıb və girişə məhdudiyyətlər qoyulub. Təşkilat İsrail tərəfini ehtiyat tədbirləri görməyə və regiondakı məsuliyyətini yerinə yetirməyə çağırıb.