İsraildən uğursuz hava hücumu | Hadisənin detalları açıqlandı

SAXAL-ın Qəzzanın cənubunda həyata keçirdiyi uğursuz hava hücumları nəticəsində 1 nəfər İsrail hərbçisi ölüb, 6 nəfər isə yaralanıb.

Buna isə texniki nasazlığa görə raketlərdən birinin desantların olduğu binaya düşməsi səbəb olub.

Hazırda onların 3 nəfərinin vəziyyəti orta ağır qiymətləndirilir. Digərlərinin durumunun isə yaxşı olduğu açıqlanıb.

Bu arada İsrail Müdafiə Ordusu Rəfahın Bureyc düşərgəsində yaşayış binalarına hücum edib. Zərbələr nəticəsində azı 6 nəfər ölüb. Rəfahda isə bir evin hədəf alınmasından sonra daha 4 nəfər həlak olub.

Eyni zamanda İsrail Ordusu Xan Yunis yaxınlığındakı əl-Məvasi bölgəsinə də zərbələr endirib. Nəticədə azı 5 nəfər yaralanıb.

Qəzza da zərbələrdən kənarda qalmayıb. İsrail Ordusu şəhərin Təl-Həlva, Sabra və Zeytun məhəllələrini atəşə tutub.

Dəfələrlə bombalanan Nuseyrat düşərgəsi də yenidən hücumlara məruz qalanların siyahısında olub. Düşərgənin şimal-qərb hissəsi və Deyr əl-Bəlahın şərqi dronlarla vurulub.

Hadisə nəticəsində ölən və yaralananlar barədə heç bir məlumat verilməyib.