İsrailin İrana qarşı əməliyyatının məqsəsi nədir? | Netanyahudan açıqlama

İsrail hələ də ABŞ Prezidenti Donald Trampın İranın nüvə proqramına qarşı zərbələrə qoşulacağını gözləyir.

Bu barədə adı açıqlanmayan İsrail rəsmisinə istinadən “The Times of Israel” qəzeti məlumat yayıb.

“Gözləntiləri onların qoşulmasıdır, lakin heç kim onları məcbur etmir. Onlar özləri bu barədə qərar qəbul etməlidirlər. Növbəti 24-48 saat ərzində biləcəyik”, ‒ deyə İsrail rəsmisi bildirib.

Bu arada, İran hökumətinin devrilməsi İsrailin İrandakı əməliyyatının məqsədi deyil, nəticəsi ola bilər. Bunu İsrail Baş naziri Benyamin Netanyahu “Kan” dövlət televiziya və radio şirkətinə müsahibəsində deyib.

“Əsas məqsəd İranın nüvə təhlükəsini aradan qaldırmaqdır. İkincisi, Tehrandan ballistik raket təhlükəsini aradan qaldırmaq lazımdır. Eyni zamanda İranda hökumətin qeyri-sabit olacağı da göz qabağındadır. Bu, məqsəd deyil, nəticə ola bilər”, ‒ deyə Netanyahu bildirib.