İsrailli diplomatlar Türkiyə və bəzi ölkələri tərk edir

Qəzza zolağındakı vəziyyətlə əlaqədar İsrail Xarici İşlər Nazirliyi vətəndaşlarının başqa ölkələrdən təxliyəsinə başlayıb.

Səbəb onlara qarşı təhlükə riskinin olmasıdır. Eyni zamanda diplomatik nümayəndəliklərin bütün əməkdaşlarına da diqqətli olmaq barədə çağırış edilib. Oktyabrın 19-da İsrailin Ankaradakı səfiri İrit Lilian digər diplomatlarla birlikdə Türkiyəni tərk edib. Bu barədə Türkiyə mətbuatı məlumat yayıb. İsrail səfirliyi isə informasiyanı şərh etməkdən imtina edib.

Xatırladaq ki, Prezident Rəcəb Tayyib Ərdoğanın bəşəriyyəti Qəzzada baş verən hadisələri dayandırmaq çağırışından sonra minlərlə insan İsrailin İstanbuldakı konsulluğuna daxil olmağa cəhd edib. Bundan sonra İsrailin Milli Təhlükəsizlik Şurası Türkiyəyə səyahət xəbərdarlığı edib. Şura həmçinin Türkiyədəki İsrail vətəndaşlarını tez bir zamanda ölkəni tərk etməyə çağırıb. İsrailə məxsus olan aviaşirkətlər ölkəni tərk etmək istəyən vətəndaşlar üçün İstanbuldan uçuşlar təşkil edib.

Türkiyə ilə yanaşı, Misir, Bəhreyn, İordaniya və Mərakeşdəki səfirliklər də boşaldılıb. Səbəb Qəzza zolağında xəstəxanaya edilən hücumdan sonra bu ölkələrdə İsrailə qarşı etirazların başlaması olub.

İsrail Xarici İşlər Nazirliyi fələstinlilərə dəstək nümayişləri ilə əlaqədar oktyabrın 18-də Misirin paytaxtı Qahirədəki və Mərakeşin Rabat şəhərindəki əməkdaşlarını təxliyə edib. Nümayişlərdə Qəzzanın Əl-Əhli xəstəxanasında 471 nəfərin ölümü ilə nəticələnən hücum da pislənib.

Baş verənlərlə əlaqədar ABŞ, Kanada, Fransa, Almaniya, Avstraliya, İtaliya, Ukrayna, Polşa, Cənubi Koreya və bir sıra ölkələr vətəndaşlarını İsraili tərk etməyə çağırıb.