İsrailli diplomatları gülləyən şəxs görün nə dedi | ABŞ-dəki atışmanın detalları

ABŞ Prezidenti Donald Tramp Vaşinqtonda, Yəhudi Muzeyi qarşısında İsrail səfirliyinin iki əməkdaşının ölümü ilə nəticələnən atışmanı "antisemitizmə əsaslanan" akt adlandırıb.

Ağ Ev rəhbəri bununla bağlı sosial şəbəkə hesabında paylaşım edib.

"Açıq-aşkar antisemitizm motivləri ilə törədilən bu dəhşətli qətllər dayandırılmalıdır! ABŞ-də nifrət və radikalizmə yer yoxdur", ‒ deyə Tramp bildirib və ölən diplomatların ailələrinə başsağlığı verib.

Qeyd edək ki, Vaşinqtonda Yəhudi Muzeyinin qarşısında İsrail səfirliyinin iki əməkdaşını güllələməkdə şübhəli bilinən şəxs artıq saxlanılıb.

Vaşinqton Polis Departamentinin rəisi Pamela Smit mətbuat konfransında deyib ki, şübhəli şəxs Çikaqodan olan 30 yaşlı Elias Rodriqesdir.

Atışmadan əvvəl onun muzeyi dolaşması müşahidə edilib. Atışmadan sonra o, muzeydə mühafizəçi tərəfindən saxlanılıb.

Elias Rodriqes saxlanılarkən "Fələstinə azadlıq!" şüarı səsləndirib. Onun adı əvvəllər heç bir cinayətdə hallanmayıb.