İsraillilərin İordan çayının qərb sahilinə köçü insidentsiz ötüşmür

Qəzza zolağında vəziyyət gərgin olaraq qalır.

İsrailin nəzarətində olan İordan çayının qərb sahilində insanlar su və yemək qıtlığı ilə üzləşirlər.

Yerli sakinlər sözügedən problemə görə əraziyə köçürülən İsrail vətəndaşlarını günahlandırırlar.

İordan çayının qərb sahilindəki ən böyük Fələstin şəhərlərindən biri və inzibati mərkəz olan Ramallahda su qıtlığı yaşanır.

“Biz sadəcə həftədə 2 dəfə su tapırıq. İnsanlar suya görə buraya gəlməyə məcburdurlar”, – deyə yerli sakinlərdən biri vurğulayıb.

Birləşmiş Millətlər Təşkilatı 2025-ci ilin ilk yarısında İordan çayının qərb sahilində su quyuları, boru kəmərləri, suvarma şəbəkələri və su ilə əlaqəli digər infrastrukturun dağıdılmasında ittiham olunan yəhudi mühacirlər haqqında 62 insident qeydə alıb.

Bildirilib ki, israillilər iyunun 1-dən iyulun 14-dək Ramallah, Salfit və Nablus bölgələrində bulaqları, həyati əhəmiyyət kəsb edən su infrastrukturunu hədəf alan çoxsaylı hücumlar həyata keçiriblər.

Bundan əlavə, fələstinlilər uzun müddətdir İordan çayının qərb sahilində yaşayan yəhudi köçkünlər tərəfindən hədə-qorxu, təqib və fiziki zorakılıqla üzləşdiklərini də etiraf ediblər.

İsrail öz vətəndaşlarının su infrastrukturuna qəsdən ziyan vurması ilə bağlı məlumatlı olsa da, heç bir qabaqlayıcı tədbir görülməyib.