İstanbul "İstəklilər koalisiyası"na qoşulacaq? | “Türkiyə ilə eyni baxış bucağımız var”

“Türkiyənin “istəklilər koalisiyası”na cəlb edilməsi çox vacibdir”.

Bunu Ukrayna Prezidenti Volodimir Zelenski Ankarada türkiyəli həmkarı Rəcəb Tayyib Ərdoğanla birgə mətbuat konfransında bildirib.

O, diplomatik proseslərin fəallaşdığını və təhlükəsizlik zəmanətlərinin zəruriliyini vurğulayaraq əlavə edib ki, Ukrayna bütün tərəfdaşlarla koordinasiyanı davam etdirəcək.

Ukrayna Prezidenti Türkiyənin Qara dəniz regionunda sabitliyin təmin olunmasındakı rolunu xüsusi qeyd edərək, təhlükəsizliyin yalnız birgə səylərlə təmin edilə biləcəyini vurğulayıb.

O, Türkiyə siyasətinin gücünə və onun Moskva tərəfindən nəzərə alınacağına güvəndiyini deyib: “Müharibə sona çatmalıdır. Rusiya bunun məsuliyyətini anlamalıdır. Bu məsələdə Türkiyə ilə eyni baxış bucağımız var. Türkiyəyə bütün dəstəklərinə görə minnətdaram. Ümid edirik ki, bu ilin sonuna qədər Rusiya ilə hərbi və mülki əsirlərin mübadiləsini bərpa etmək mümkün olacaq. Bu məsələdə Türkiyə bizə çox kömək edir”.

Ukrayna lideri həmçinin müdafiə sənayesi üzrə ortaq istehsal layihələrindən də danışıb. Bu istiqamətdə Türkiyə Prezidenti ilə ikitərəfli görüşdə müzakirələr apardığını diqqətə çatdırıb.

Türkiyə Prezidenti Rəcəb Tayyib Ərdoğan vurğulayıb ki, ölkəsinin Krım tatarlarına dəstəyi davam edəcək: “Strateji tərəfdaşımız Ukraynanın ərazi bütövlüyü, suverenliyi və müstəqilliyinin tərəfdarı olduğumuzu bir daha bildirdik. Ukrayna ilə aramızda tarixi və mədəni bağ olan Krım tatarlarına dəstəyimizin də davam edəcəyini qeyd etmək istəyirəm”.

Türkiyə Prezidenti Rəcəb Tayyib Ərdoğan Rusiya və Ukrayna nümayəndələri arasında İstanbul görüşlərinin davam etdirilməsinin tərəfdarı olduğunu bildirib. Onun sözlərinə görə, İstanbul görüşləri zamanı humanitar məsələlərdə irəliləmə mümkün olub.