İstefaya hazırlaşan Ukraynanın müdafiə naziri açıqlama verib

“Müharibənin bir günü Ukraynaya 100 milyon dollara başa gəlir və bu, könüllülərin hesabına yığılan məbləğ deyil, əsasən dövlət vəsaitidir”.

Bu barədə Ukraynanın istefa prosesində olan müdafiə naziri Aleksey Reznikov açıqlama verib. Cəbhədə dronların azlığı və onların niyə büdcənin deyil, vətəndaşların bağışladığı vəsaitlə alınması barədə suala cavabında Reznikov bildirib ki, müharibəyə könüllülər tərəfindən göndərilən vəsaitlər ümumi vəsaitin 3%-ni təşkil edir.

“Sizə deyə bilərəm ki, 2022-ci il fevralın 24-dən bu günə qədər könüllü ianələr müharibəyə göndərilən hər şeyin 3%-ni təşkil edir. Müharibənin bir günü bizə 100 milyon dollara başa gəlir. İndi bütün böyük könüllü fondlarının büdcələrini götürün, baxın ki, nə qədər vəsait toplayırlar və ümumilikdə gündə 100 milyon dollar xərcləyən dövlətə baxın. Sadəcə bu barədə düşünün”, – deyə o qeyd edib.

Reznikovun fikrincə, dövlətə qarşı bununla bağlı etirazlar irəli sürmək ədalətsizlikdir, çünki bu belə deyil.

“Əslində, bunu Ukrayna vətəndaşları edirlər – işləyən vətəndaşlar, çünki onlar vergi ödəyirlər və bu vergilər büdcəyə gedir, büdcədən də orduya ayrılır. Hazırda ən çox pul orduya gedir. Amma bütövlükdə ölkənin saxlanması üçün də vəsait lazımdır: infrastruktur, yenidənqurma və sair. Ona görə də işləmək və vergi ödəmək lazımdır. Bizneslər aktiv olmalı və sahibkarları dəstəkləməlidir”, – deyə Reznikov əlavə edib.