İtirilmiş dişlərin bərpasındakı bu üsul dünyaya səs saldı

Alimlər ilk dəfə insan və donuz hüceyrələrinin kombinasiyası ilə yeni dişlər yetişdiriblər.

Bu barədə tədqiqatın nəticələri “Stem Cells Translational Medicine” jurnalında dərc olunub.

Bildirilir ki, Tafts Universitetinin Stomatologiya Məktəbindən professor Pamela Yelik və komandası insan diş pulpası hüceyrələri ilə donuzların çıxmamış dişlərindən alınan epitel hüceyrələrini birləşdirərək yeni dişəbənzər strukturlar yetişdirməyi bacarıb.

Hüceyrələr xüsusi karkasa yerləşdirilərək yetkin donuzların çənəsinə implantasiya olunub. Bir neçə ay sonra bio-istehsal edilmiş dişlər təbii dişlərin inkişaf mərhələlərindən keçib.

“Biz tamamilə insan dişinə bənzəyən gözəl kiçik dişlər yetişdirdik”, ‒ deyə P.Yelik vurğulayıb.

Tədqiqatçılar gələcəkdə insan çənəsində birbaşa yeni dişlərin yetişdirilməsi yollarını araşdırır və ümid edirlər ki, növbəti 10 il ərzində itirilmiş dişlərin yerində tam canlı insan dişləri yetişdirmək mümkün olacaq.

“Ən yaxşısı öz dişlərinizi qorumaqdır. Amma əgər bir şey olarsa, insanlara bioloji əvəzləyicilər təklif etmək istəyirik”, ‒ deyə o, sözlərini yekunlaşdırıb.