Jurnalistin iddiası başına bəla oldu | Sensasiyalı xəbərin detalları üzə çıxdı

Türkiyənin müxalif Cümhuriyyət Xalq Partiyasına (CHP) qəyyum təyin ediləcəyi barədə iddia irəli sürən jurnalist Rasim Ozan Kütahyalı saxlanılıb.

“Teleqraf” xəbər verir ki, jurnalistin sosial mediada verdiyi açıqlamanın ardınca ədliyyə naziri Yılmaz Tunç iddianı təkzib edərək R.O.Kütahyalı barəsində cinayət işinin açıldığını açıqlamışdı.

Ankara Baş Prokurorluğunun “ictimaiyyəti çaşdıran məlumat yaymaq” ittihamı ilə başlatdığı istintaq çərçivəsində jurnalist barəsində saxlanılma qərarı verilib.

Rasim Ozan Kütahyalı aprelin 10-da partiyanın qurultayında saxtakarlıq iddiasına görə hökumət tərəfindən CHP-yə qəyyum təyin ediləcəyini söyləmişdi:

“Aprelin 11-də CHP-nin 2023-cü ilin noyabrında keçirilmiş qurultayının nəticələri ləğv ediləcək. CHP-yə müvəqqəti qəyyum təyin olunacaq və partiyanın yeni qurultayı iyunun 1-də keçiriləcək. Həmin şəxsin (qəyyumun) Hikmət Çətin olacağı bildirilir.

Mümkün saxtalaşdırma ehtimalına görə İstanbuldan Ankaraya çoxlu sayda təhlükəsizlik qüvvələri göndərilib. Ankaradakı bütün təhlükəsizlik orqanlarında məzuniyyət ləğv edilib. Sabah Ankara çox uzun bir günə hazırlaşır. Təəssüf ki, belə görünür”.

R.O.Kütahyalının iddiası sosial şəbəkələrdə geniş müzakirə mövzusuna çevrilib, ictimi-siyasi çevrələrdə gərginliyə səbəb olub.

Xatırladaq ki, CHP aprelin 6-da növbədənkənar qurultay keçirib. Hazırkı sədr Özgür Özəl qurultayda ikinci dəfə partiyanın rəhbəri seçilib.