Kanada ABŞ-nin ştatı olacaq? - Trampın dünyanı silkələyən planı

ABŞ-nin yeni seçilən prezidenti Donald Tramp Kanadanın ölkəsi ilə “birləşməsi” çağırışını yenidən dilə gətirib.

Mətbuat konfransı zamanı jurnalistin “Kanadanı ilhaq etmək və əldə etmək üçün hərbi gücdən istifadə etməyi də düşünürsünüz?” sualını cavablandıran Tramp bildirib ki, Kanadada bir çox insan 51-ci ştat ideyasını bəyənir.

“Bizə iqtisadi güc lazımdır. Kanada və ABŞ – biz birlikdə çox böyük millət olardıq. İnsanlar o süni şəkildə çəkilən xəttdən qurtulardı. Bu həm də milli təhlükəsizlik baxımından daha yaxşı olardı. Unutmayın, biz Kanadanı qoruyuruq. Mən Kanada xalqını sevirəm. Lakin ABŞ daha Kanadanın ayaqda qalmaq üçün tələb etdiyi böyük ticarət kəsirlərinə dözməyəcək. Biz onu qorumaq üçün ildə yüz milyardlarla pul xərcləyirik. Castin Trüdo bunu bilirdi və bu səbəbdən istefa verdi. Kanada ABŞ ilə birləşərsə, əlavə tariflər və yüksək vergilər olmayacaq, üstəlik, onlar Rusiya və Çin hərbi gəmilərinin təhlükəsindən də uzaq qalacaqlar. Hər yerdə Rusiya, Çin gəmiləri var. Biz isə buna imkan verməyəcəyik”, – o qeyd edib.

Çıxışından bir qədər sonra Donald Tramp sosial şəbəkə hesabında Kanadanın ABŞ-yə qoşulacağı təqdirdə ölkənin necə görünəcəyini göstərən xəritə paylaşıb. Bu xəritədə Kanada və ABŞ eyni rəngə boyanaraq üzərinə Amerika Birləşmiş Ştatları yazılıb.