Kennedi ilə bağlı məxfi sənədlər | ABŞ tarixinin qaranlıq məqamı üzə çıxır

ABŞ-nin Prezidenti Donald Tramp ölkənin tarixində ən çox müzakirə olunan hadisələrdən biri – Prezident Con Fitzgerald Kennedinin qətli ilə bağlı məxfi sənədlərin açıqlanmasına dair sərəncam imzalayıb.

Bu addım hadisə ilə bağlı yeni məlumatların ictimaiyyətə çatdırılması və müzakirələrin yenidən gündəmə gəlməsi məqsədini daşıyır.

Trampın sözlərinə görə, sənədlərin məxfiliyinin açılması tarixin qaranlıq səhifələrinin işıqlandırılması üçün vacibdir.

Kennedinin qətli ilə bağlı bu sənədlərin açılması təkcə ABŞ daxilində deyil, bütün dünyada maraqla izlənilir. İllərdir müxtəlif nəzəriyyələr və spekulyasiyalarla müşayiət olunan bu hadisə barədə yeni faktların ortaya çıxması gözlənilir.

1963-cü il noyabrın 22-də ABŞ-nin 35-ci prezidenti Con Fitzgerald Kennedi Texas ştatının Dallas şəhərində sui-qəsd nəticəsində öldürülüb. Kennediyə snayperdən iki dəfə atəş açılıb, birinci mərmi onun boynuna, ikincisi isə başına dəyib.

Açıq avtomobildə gedən zaman baş verən hadisə ölkədə və dünyada dərin şok və kədərə səbəb oldu.

Hadisənin əsas şübhəlisi kimi Li Harvi Osvald saxlanılsa da, sui-qəsd ətrafında müxtəlif nəzəriyyələr və mübahisələr bugünədək davam edir. Kennedinin ölümü ABŞ tarixinin ən qaranlıq səhifələrindən biri hesab olunur.