Kipr adasındakı sülh buna görə davam edirmiş | Zəki Aktürkdən sərt açıqlama

Cənubi Kipr arxiyepiskopunun açıqlamaları son həftələrdə gündəmdə olan yeni terror təşkilatının yaradılması ilə bağlı inkişaflarla birlikdə dəyərləndirilməlidir.

Bunu Türkiyə Müdafiə Nazirliyinin sözçüsü Zəki Aktürk deyib.

Qurum rəsmisi bildirib ki, son açıqlamalar Kipr adasında bu günə qədər həllə mane olan irqçi, fanatik və təxribatçı zehniyyətin ən bariz təzahürlərindən biridir:

“Tarixi faktları görməzdən gələn, mövcud vəziyyəti və Türkiyənin Kipr adasındakı varlığını təhrif edən bu zehniyyət sülhə, dialoqa və konstruktiv yanaşmaya ən böyük maneədir. Beynəlxalq hüquq və insani dəyərləri heçə sayan bu yanaşma Kipr türk xalqının legitim hüquqlarını və təhlükəsizliyini hədəf alır.

Unutmayın ki, Kipr heç vaxt yunan adası olmayıb. Buna bənzər ideya planlarını həyata keçirmək mümkün deyil və buna imkan verilməyəcək. Kipr türk xalqı bu adanın əsl və bərabərhüquqlu ortaqlarıdır və heç bir güc onları torpaqlarından çıxara bilməyəcək”.

Z.Aktürk vurğulayıb ki, bu gün Kipr adasında sülh hökm sürürsə, bunun Türkiyə sayəsində olduğunu xatırlamaq lazımdır:

“Türkiyə əvvəllər olduğu kimi, Cənubi Kiprin Kipr türklərinin təhlükəsizliyini, adada sülh və sabitliyi təhdid edən fəaliyyətlərinə qarşı qarant rolunun ona verdiyi səlahiyyətlərdən istifadə etməkdən çəkinməyəcək”.

Xatırladaq ki, bundan əvvəl Cənubi Kiprin baş yepiskopu Georgios türkləri adadan qovmağa çağırmışdı. Türkiyə və Şimali Kipr Türk Cümhuriyyəti təxribatçı açıqlamaya sərt təpki göstərib.