Kiyev bunu etməyə hazırdır | ABŞ Ukraynaya qoyulan məhdudiyyətləri aradan qaldıracaq?

Ukrayna ABŞ-nin 30 günlük atəşkəs təklifini qəbul etməyə hazırdır.

Bu barədə Ukrayna və ABŞ-nin Səudiyyə Ərəbistanının Ciddə şəhərində keçirilən danışıqlarının yekunları üzrə birgə bəyanatında qeyd olunub.

Məlumata görə, bəyanatın mətni Ukrayna Prezidenti Volodimir Zelenskinin Ofisinin saytında dərc olunub.

Qeyd edilib ki, Vaşinqton Ukraynaya yardımı və kəşfiyyat məlumatlarının mübadiləsinə qoyulan məhdudiyyəti dərhal aradan qaldıracaq.

Bəyanatda həmçinin vurğulanır ki, ABŞ və Ukrayna nümayəndə heyətləri danışıqlar aparacaq qrupların tərkibini müəyyən etmək və dərhal sülh danışıqlarına başlamaq barədə razılığa gəliblər.

Bundan əlavə, tərəflər mümkün qədər tez faydalı qazıntılar üzrə müqavilə bağlamaq, həmçinin kəşfiyyat məlumatlarının mübadiləsini bərpa etmək haqda razılıq əldə ediblər.

ABŞ dövlət katibi Marko Rubio bildirib ki, ABŞ Ukraynada atəşkəs təklifini Rusiyaya çatdıracaq. Dövlət Departamentinin rəhbəri əlavə edib ki, ABŞ tərəfi müsbət cavaba ümid edir.

Qeyd edək ki, nümayəndə heyətləri arasında danışıqlar 9 saat davam edib.