Kiyev kütləvi raket atəşi altında | Baku TV müxbiri hadisə yerində

Ukraynanın paytaxtı Kiyev növbəti dəfə kütləvi ballistik raket hücumuna məruz qalıb.

Bu barədə Baku TV-nin bu ölkədə olan əməkdaşı Mübariz Aslanov məlumat verib. O bildirib ki, hücum nəticəsində Darnitski rayonunda yaşayan azərbaycanlıların evlərinə zərər dəyib.

Dekabrın 13-ü yerli vaxtla gecə saat 3-dən başlayan raket hücumları bir saata qədər davam edib. Kiyevin Darnitski, Dneprovski, Desnyanski və Qolosevski rayonlarında xeyli dağıntı qeydə alınıb. Hücum zamanı “İskəndər” ballistik raketlərindən istifadə olunduğu bildirilir.

Kiyev hərbi administrasiyasının sözçüsü Mixail Şamanov sözlərinə görə, hava hücumundan müdafiə qüvvələri tərəfindən bütün hədəflər məhv edilib. Bu zaman vurulan raketlərin hissələri şəhərin 4 rayonuna düşüb:

“Hissələrin düşməsi ilə bağlı onlarla fakt var. Qolosevski, Darnitski və Desnyanski rayonlarında daha çox dağıntı qeydə alınıb. 9 mərtəbəli evin 7-ci mərtəbəsində yanğın baş verib, insanların təxliyəsi həyata keçirilib. 17 nəfər xilas olunub ki, onlardan da 7-si uşaqdır. Dneprovski rayonunda partlayış dalğaları pəncərələri sındırıb. Raket hissələrinin fərdi evlərə də düşdüyü aşkar olunub. Həmçinin hücum nəticəsində su kəməri zədələnib. Həyata keçirilən tədbirlər nəticəsində suyun verilişi bərpa olunub”.

Mixail Şamanovun verdiyi məlumata görə, gecə hücumu zamanı 53 nəfər xəsarət alıb. Onlardan 36-sı qadın, 17-si kişi, 6-sı isə uşaqdır. 20 nəfər xəstəxanaya yerləşdirilib.