Kiyev sakinləri istiliksiz və susuz qaldı

Rusiya Silahlı Qüvvələri Ukraynanın Xarkov vilayətinə hücum edib. Nəticədə, 1 nəfər həlak olub, 13 nəfər xəsarət alıb.

Vilayət Hərbi Administrasiyasının rəhbəri Oleq Sinequbov qeyd edib ki, hücum nəticəsində əhəmiyyətli infrastruktur obyektləri, fərdi evlər, avtomobillər və digər mülki obyektlərə ziyan dəyib.

Rusiya Silahlı Qüvvələri Kiyevə də hücum edib. Paytaxtda təxminən 6 min çoxmərtəbəli binanın istilik təchizatı vurulub. Kiyev meri Vitali Kliçko bildirib ki, şəhərin bir hissəsinin su təchizatı da kəsilib. Mer qeyd edib ki, hücumlar nəticəsində bir nəfər xəsarət alıb, həmçinin bir neçə yaşayış evi və məktəb binası zərər görüb.

Rusiya tərəfindən qeyd olunub ki, 24 saat ərzində Zaporojye və Donetskdə daha 2 yaşayış məntəqəsi nəzarətə götürülüb. Silahlı Qüvvələr Ukraynanın dron istehsal müəssisələrinə, eləcə də enerji və nəqliyyat infrastrukturuna zərbələr endirib. Rusiya Hava Hücumundan Müdafiə bölmələri 122 Ukrayna dronunu vurub. Gün ərzində 144 döyüş olub.

Ukrayna qüvvələri isə Kupyansk və Pokrovsk istiqamətlərində Rusiyanın çoxsaylı hücumlarını dəf etdiklərini bildiriblər. Ukrayna Hərbi Hava Qüvvələri və artilleriya bölmələri Rusiya mövqelərinə zərbələr endirib və Kiyev xeyli sayda Rusiya dronunun məhv edildiyini qeyd edib.