Kiyev sammitində Rusiyanın Ukraynaya hücumları pislənildi

Kiyevdə keçirilən 5-ci "Ukrayna – Cənub-Şərqi Avropa" sammitinin iştirakçıları Ukraynaya dəstəyi təsdiqləyib və Rusiyanın hərəkətlərini pisləyərək Moskvanı müharibəni dərhal dayandırmağa çağırıblar.

Bu barədə sammitin yekun bəyannaməsində qeyd olunub.

"Biz Rusiyanın Kiyev və Ukraynanın digər bölgələrinə qarşı intensivləşən müntəzəm kütləvi hücumlarını qətiyyətlə pisləyirik. Bu hücumlar beynəlxalq hüququn kobud şəkildə pozulmasıdır", – deyə sənəddə bildirilib.

Sammit iştirakçıları Ukraynanın hava hücumundan müdafiə sisteminin gücləndirilməsinin prioritet olduğunu vurğulayıblar. Bunun üçün müvafiq hava hücumundan müdafiə sistemləri və ballistik raketlərin qarşısını almaq üçün istifadə olunan raketlərin tədarükünün artırılmasının vacibliyini qeyd ediblər.

Bəyannamədə həmçinin deportasiya edilmiş və məcburi köçürülmüş Ukrayna vətəndaşlarının, o cümlədən uşaqların geri qaytarılmasına, qanunsuz saxlanılan mülki şəxslərin və hərbi əsirlərin azad edilməsinə, eləcə də Ukraynaya qarşı törədilmiş cinayətlərə görə məsul şəxslərin məsuliyyətə cəlb olunmasına çağırış yer alıb.

Bundan əlavə, sənədi imzalayan tərəflər Rusiyaya qarşı sanksiya təzyiqinin gücləndirilməsini və təhlükəsizlik sahəsində beynəlxalq əməkdaşlığın möhkəmləndirilməsini dəstəkləyiblər.

Sənəddə həmçinin Ukrayna və Moldovanın Avropa İttifaqına üzvlük prosesi çərçivəsində danışıqların yeni mərhələlərinin açılmasına, eləcə də Ukraynanın NATO-ya üzvlüyünə dəstək ifadə olunub.

Sammitdə Ukrayna Prezidenti Volodimir Zelenski, Albaniya, Yunanıstan, Moldova, Rumıniya, Xorvatiya, Sloveniya, Şimali Makedoniya, Monteneqro və Bolqarıstanın liderləri iştirak ediblər.

Görüş Avropa Komissiyasının Prezidenti Ursula Fon der Lyayenin iştirakı ilə keçirilib. Növbəti "Ukrayna – Cənub-Şərqi Avropa" sammitinin 2027-ci ildə Sloveniyada keçirilməsi planlaşdırılır.