Kiyevdən Moskvaya yeni mesaj göndərilib | Sanksiyalar mövzusuna toxunulub - Baku TV

“Ukrayna kəşfiyyatı təcavüzkar ölkənin planlarını müəyyən edib və biz asimmetrik əks-tədbirlər hazırlayırıq”.

Bu barədə Ukrayna Prezidenti Volodimir Zelenski qeyd edib.

O bildirib ki, əsas məsələ payız-qış dövrü üçün Ukraynanın Müdafiə və Təhlükəsizlik Qüvvələrinin ehtiyaclarının qarşılanmasıdır.

Zelenski əlavə edib ki, Rusiyaya qarşı sanksiyaların nəticələrinin təhlili davam edir:

“Qeyd olunmuş sanksiyalar planı həyata keçirilir və biz prioritetləri dərhal tənzimləyirik ki, Ukraynanın imkanları sanksiyalar planımızın bütün məqsədlərinə çatmaq ehtiyacını 100 % ödəsin”.

Onun sözlərinə görə, Rusiya rəhbərliyini müharibəyə son qoymaq üçün tamhüquqlu dialoqa başlamağa inandırmağın real yolu məhz Vaşinqtonun aktiv mövqeyindən asılıdır.

“Ukrayna Rusiyaya qarşı daha aqressiv hücumlar mərhələsinə keçəcək”.

Bu barədə isə ukraynalı jurnalist Andrey Tsaplyenko məlumat verib.

O qeyd edib ki, Ukrayna ABŞ-ni rəsmi olaraq Rusiya ərazisinə yeni, daha da sərt zərbələr mərhələsinə keçməsi barədə məlumatlandırıb.

Məsələ ilə bağlı Rusiyanın xarici işlər naziri Sergey Lavrov da münasibət bildirib.

O bəyan edib ki, Moskva Ukrayna Silahlı Qüvvələrinin ölkə ərazisinin dərinliklərinə endirdiyi zərbələrə və Avropa İttifaqının addımlarına cavab olaraq hərbi əməliyyat metodlarını sərtləşdirəcək.