Kiyevə bu silaha görə nə üçün qadağa qoyuldu? | Ukrayna və Rusiya müharibəsinin yeni mərhələsi

Ukrayna hərbçilərinin Rusiya ərazisinə daxil olması ilə artıq Rusiya-Ukrayna qarşıdurmasının yeni fazaya keçid etdiyini söyləyə bilərik.

“Qarşıdurmanın yeni mərhələsində Ukrayna Rusiya ərazisində, o cümlədən Kursk vilayətində hücum zamanı Britaniya silahlarından sərbəst istifadə edə bilər”, – deyə Britaniyanın Müdafiə Nazirliyi krallığın mövcud mövqeyini ifadə edib.

Bu barədə “The Times” nəşrində bildirilib.

Lakin Ukrayna Birləşmiş Krallığa aid “Storm Shadow” raketlərindən Rusiyadakı hədəfləri vurmaq üçün istifadə edə bilməz.

Bu qanadlı raketlərin üstünlüyü nədən ibarətdir və qarşıdurmanın gedişində Britaniyanın ehtiyat etdiyi məqamlar hansılardır?

Hərbi ekspert Elxan Şıxəliyev bildirib ki, “Storm Shadow” qanadlı raketləri 1300 kiloqrama qədər ağırlıqda, 560 kilometrə qədər məsafədə, saatda 1000 kilometr sürətlə hərəkət edərək qarşı tərəfin hava hücumlarından müdafiə sistemlərinə, zenit-raket komplekslərinə yaxalanmamaq üstünlüyünə malikdir:

“Bu səbəbdən Böyük Britaniya düşünür ki, Ukrayna bu silahlarla Rusiyanın dərinliklərindəki strateji obyektlərə zərbə endirdikdə Rusiya taktiki nüvə silahının istifadəsinə dair yararlılığını göstərə bilər”.