Kiyevi nə gözləyir? | Ukrayna yeni böhranın astanasındadır? - Baku TV

Ukrayna tammiqyaslı müharibənin başlanmasından bəri ən çətin büdcə vəziyyəti ilə üzləşib. Ölkənin gələn il üçün büdcəsində 32,6 milyard dollar çatışmazlıq yaranıb.

Bu barədə Ukraynanın maliyyə naziri Sergey Marçenko məlumat verib.

Nazirin sözlərinə görə, müttəfiqlər tərəfindən əlavə maliyyə yardımı göstərilməsə, dövlət müharibə ilə birbaşa əlaqəsi olmayan bəzi xərcləri təxirə salmağa məcbur qala bilər. Xüsusilə sığınacaqların tikintisi və infrastruktur layihələri ilə bağlı problemlər yarana bilər. Bununla belə, hərbi xərclər prioritet olaraq qalacaq.

Marçenko bildirib ki, 2027-ci ilin büdcəsi müharibənin gələn il də davam edəcəyi ehtimalı nəzərə alınmaqla hazırlanır. Ukraynanın maliyyə naziri həmçinin Avropa İttifaqını təxminən 300 milyard dollar həcmində dondurulmuş Rusiya aktivlərindən Ukraynanın maliyyələşdirilməsi üçün istifadə ideyasına qayıtmağa çağırıb.