Kiyevin taleyi belə həll olunur

“Ukrayna sülh danışıqlarına başlamağa hazırdır”.

Bunu Ukrayna Prezidenti Volodimir Zelenski NBC telekanalına verdiyi müsahibədə bildirib.

“Əgər biz münaqişəni dayandırmaq və diplomatik yolla təxirəsalınmaz sülh danışıqlarına başlamaq istəyiriksə, hərbi qüvvələrin yerləşdiyi mövqelərdə dayanmalıyıq. Yəni hazırkı təmas xəttində”, ‒ deyə Zelenski bildirib.

Bu isə o deməkdir ki, hücumlar dayandırılmalı, Rusiya yeni yaşayış məntəqələrini ələ keçirməməlidir.

O ki qaldı Ukraynanın müharibəni dayandırmaq istəyinə, bu, bir neçə səbəbə bağlıdır. İlk növbədə cəbhə xəttində Rusiyanın aramla olsa da, irəliləməsi müşahidə edilir. Ukrayna sonuncu dəfə 2023-cü ilin yayında böyük əks-hücum əməliyyatı həyata keçirə bilib. Hərbi sahədəki durğunluq ictimai etimada da təsir göstərir.

Ukraynanın silah ehtiyatı və şəxsi heyət sayında da boşluqlar var. Donald Tramp hakimiyyətə gəldikdən sonra ABŞ Ukraynaya silah ixracını müəyyən qədər azaldıb. Avropa İttfaqı Ukraynaya hərbi yardım göstərmək üçün ABŞ silahlarına pul ödəməli olur.

Zelenskinin “hazırkı təmas xətti əsasında” danışıqlara razılaşması ərazilərin bir hissəsini faktiki itirmək anlamına gəlsə də, bu, daha böyük itkilərin qarşısını almaq üçün kompromis axtarışıdır. Bu, həm də beynəlxalq ictimaiyyətə “biz sülh istəyirik, Rusiya isə istəmir” mesajıdır. Halbuki Tramp Zelenski ilə görüşdə Vladimir Putinin də savaşı dayandırmaq istədiyini açıqlayıb.

Hər halda Zelenski öz gedişini etdi. Artıq növbə Putinindir. Ağ Ev rəhbəri bütün təzyiq və güzəştlərdən istifadə edərək rusiyalı həmkarını münaqişəni dayandırmağa razı salmalıdır. Əks təqdirdə müharibə davam edəcək.